協調性

首先，我一定唔係一個有協調性既人。因為過去既工作經驗好多時都係1個/N個上司+自己既情況比較多，所以有咩起事上黎好多時都係靠自己去應對。所以就算話自己係而家份工做左5年，叫做升左上一個正正式式既經理都好，好多時都唔識同Teammate協調。

雖然本身我唔係D咩外向同特別鐘意社交既人，所以某程度上協調性唔太高對我影響都不大。但當兩個合作左分別3年同4年既同事（日本人1個同內地人2個) 離職後，其實都幾大影響。

因為新黎既同事空降落黎做另一個內地同事既阿head，仲要係唔熟隻GAME既情況下搞到我平時做野D方向都亂哂龍；然後對面公司既對口又係因為離職，而換左個一俾意見就有理無理都Ban哂所有idea既機械人過黎；要同呢兩位人兄去協調真係花左我2年時間都搞唔掂，然後下下都要我上頭出黎說服一輪之後，而家先叫做其中一邊肯生生性性；但去到對面公司個位人兄就真係…佢上頭又唔理佢，而佢自己又感覺良好咁都唔知點同佢協調落去。

然後玩MTG呢隻卡game都係，EDH(Commander)本身既係一個需要互相傷害，同時又需要同其他人協調去優先集中擊破一個強勢既玩法。但通常我都係成日想一個去搞定哂其他對手然後令自己獨贏，所以話我自私、利己等，都係無可否認。但與此同時，其實呢種心態完全同我既工作方式一樣，反映出「唔會想主動依靠人，一心只係想自己對應得哂所有事」既心態。

當然呢種心態一定會令自己辛苦，因為乜都要自己一腳踢；但好處係所有野都係可以自己管理同控制，唔洗下下同人上報進度，有咩野出問題都可以自己一個調整到，同埋唔洗下下因為意見上有分岐而需要同人嘈。

所以，我開始有俾呢種心態困惑到我係咪應該仲要做而家呢份工，定還是一邊繼續做呢份工，一邊自立門戶學做小遊戲同畫圖，同埋自己租個Studio黎閉關用。

不過無論點都好，有時間先再諗呢D野。但學畫圖就已經係勢在必行，之後有機會都係到PO下自己平時練習畫個D圖。